ليه يابلدى ؟؟؟

ليه يابلدى ؟؟
ليه يابلدى .. خليتيني كرهت نفسى
كرهت عمري .. وفقدت الأمل
حتى العصافير ع الشجر
مبقتش تفرح من كتر الزعل
أو تغرد لما بتشوف القمر
وتحت نور الشمس
لسه مكسله
حتى ملهاش نفس تمرح
أو تطير علشان تلقط رزقها
وقت السحر
ليه يابلدى بتعصرى جوايا الألم
هيا ناقصه
مكفاكيش ظهرى إللى إنكسر
ويا عمري إللى إندثر
هانت عليك العيشه
ودلوقتى بقيت ملطشه
ليه يابلدى بقيتى غابة
دايره فيك الوحوش
نهب وخربشه
وإللى يرفع راسه
ينداس وينضرب القفا
ليه يابلدى بقيتى غابة
ع الغلابه
إللى زى ينكفى ..أو يختفى
قالوا .. هوه ده زمن الكبير
قطط ثمان .. أو حيتان
طب يروح فين عبد السلام
قالو ..هوا دة عصر الزعيم
الكل يسمع الكلام
أو تنهشه السلعوة
أو يتوه وسط الزحام
تاخدة شوطه .. ما ترجعه
أظن مفهوم الكلام
وللا نعيد كمان
قلت طب ليه كل ده
قالو عشان حتى لو رجع
لازم يستنى دوره فى الطابور
عشان رغيف
أو بطاقه فيها كيلو رز وكيلو زيت
والنصيحه ينام خفيف